KOLNews

திரைப்படம் மீதான விமர்சனங்களை தவிர்க்க வேண்டும் - பாஜகவினருக்கு அண்ணாமலை வேண்டுகோள்.

அண்மையில் ஓடிடி தளத்தில் வெளியாகி பெரும் பரபரப்பை ஏற்படுத்திய 'ஜெய் பீம்' திரைப்படம் குறித்து பல்வேறு அரசியல் தலைவர்களும் கருத்து தெரிவித்திருந்த நிலையில், தமிழக பாஜகவை சேர்ந்த எச்,ராஜா உள்ளிட்டோரும் கருத்து தெரிவித்திருந்தனர். பொதுவாக இப்படம் குறித்து சமூகவலைத்தளங்களில் வாத பிரதிவாதங்கள் காரசாரமான முறையில் உள்ளது. 

இந்நிலையில், இது தொடர்பாக தமிழக பாஜக தலைவர் அண்ணாமலை இன்று அறிக்கை ஒன்றை வெளியிட்டுள்ளார். அதில், 

"வரலாறு மற்றும் உண்மை சம்பவங்களை மையமாகக் கொண்டு வரும் திரைப்படங்களில் உண்மைக்கு புறம்பானக் கருத்துக்கள் வந்தால் அதை மக்களுக்கு எடுத்துரைப்பதில் எந்த தவறும் இல்லை. சில இடத்திலே பாரதிய ஜனதா கட்சி நம்முடைய கண்டனங்களை கடுமையாக பதிவும் செய்திருக்கின்றது.

திரைப்படம் என்பது பெரும்பாலும் இயக்குநரின் கற்பனையின் வெளிப்பாடு அவர்கள் பார்த்த, படித்த மற்றும் கேள்விப்பட்ட சம்பங்களின் அடிப்படையில் ஒரு திரைப்படம் உருவாகிறது. நமது கட்சியின் சகோதர சகோதரிகள், சிலநேரங்களில் பொழுதுபோக்கு திரைப்படங்களையும் விமர்சிக்கத் தொடங்கியுள்ளனர்.

கட்சியில் முக்கிய பதவியில் இருக்கும் யார் சொல்லும் கருத்தும் கட்சியின் கருத்தாக மாறுகின்ற சூழல் இருக்கிறது. அது நிறைய நேரத்தில் நமது கட்சியின் கருத்தாக மாறிவிடுகிறது. எப்பொழுது, எதற்காக பேச வேண்டுமோ அப்பொழுது பேச வேண்டும். பேசக்கூடாத நேரத்தில், பேசுவதை தவிர்க்க வேண்டிய இடத்தில் பேசாமல் இருப்பது அதைவிட முக்கியமான அரசியல் நயம்!

நமது இலக்கு, நமக்குக் கொடுக்கப்பட்ட பொறுப்பு, நமக்கு முன் இருக்கும் சவால்கள் இவற்றை மனதில் கொண்டு கவனமாகச் செயல்படுங்கள்! எனவே திரைப்படத்துறை குறித்து தேவையற்ற விமர்சனங்கள் விவாதங்கள் கருத்துக்களை கட்சி நிர்வாகிகள் தவிர்க்க வேண்டும் என்பதை தெரிவித்துக்கொள்கிறேன்"

என குறிப்பிட்டுள்ளார் அண்ணாமலை.

English Summary

Criticism of the film should be avoided - Annamalai appeals to BJP.

Latest Articles

KOLNews